Isa ang patay kag isa ang naaresto sa lima ka mga inmates nga nagpalagyo sa Negros Occidental District Jail kahapon sang kaagahon matapos nga matiruhan sang mga otoridad kadungan sang manhunt operation sa Hacienda Veles, Barangay Blumentritt, Murcia, Negros Occidental kaina sang aga.
Sa interview sang Bombo Radyo Bacolod kay Police Captain Gerald Moya, hepe sang Murcia Municipal Police Station, natultulan ang ginapanaguan nanday Francisco Epogon, ang lider sang Epogon robbery group; Marvin Celeste, utod sini nga si Danilo Celeste, Alejandro Montoya kag Daniel Tamon matapos magpanawag ang punong barangay sang Barangay Blumentritt kag nagpanugid nga nagreklamo ang pila ka mga residente nga sila ang ginkawatan sang pagkaon kag cellphone sa tiange.
Sa pagresponde sa lugar, nahibaluan sang mga pulis nga ang mga suspetsado sa pagpangawat amo man ang mga pugante nga ginapangita sang Bureau of Jail Management and Penology.
Nagpakig-angot ang hepe sa BJMP nga gilayon man nga nagresponde sa lugar.
Suno sa barangay tanod, nagpanago ang lima sa kawayanan.
Sa ila nga pagpalagyo, napilitan ang kapulisan nga sila ang tiruhon.
Bangud sa madamo nga pilas, gilayon nga ginbawian sang kabuhi si Marvin Celeste samtang pilason naman si Danilo Tamon.
Siya ang ginsakay sa bus sang BJMP.
Sanday Epogon, Danilo Celeste kag Alejandro Montoya ang padayon pa nga ginapangita sa karon.
