Temporaryo nga ginpauntat sang Department of Public Works and Highways – Negros Island Region ang ginapatigayon nga installation sang solar pavement stud sa Lacson Street, Barangay Mandalagan, Bacolod City.
Sa interview kay DPWH-NIR Assistant Regional Director Engr. Rodney Gustilo, matapos makita ang facebook post sang Bombo Radyo Bacolod tuhoy sa ongoing installation kahapon, gilayon nga nagpadala sang memorandum si Regional Director Engr. Denise Maria Ayag kay DPWH Bacolod District Engineer Leah Jamero nga untaton anay ang operasyon.
Ginhingyo sini nga magsumiter anay si Jamero sang detailed justification kun paano nakaplastar sang unit price sa kada solar pavement stud.
Aminado si Gustilo nga mainit sa karun ang issue matapos magpagwa sang kaangay nga issue si Baguio City Mayor Benjamin Magalong kun sa diin overpriced ang presyo sa kontrata sang DPWH kun sa diin nagdangat sa P11,720 ang kada unit, apisar nga P1,600 lamang ang actual price.
Paathag ni Gustilo nga natukiban nila nga may tatlo ka solar pavement studs installation project ang Bacolod City, apang ini ang wala na nagalabay sa DPWH-NIR.
Ini bangod may mga proyekto nga wala nalakip sa General Appropriations Act, kag ang pondo ang ginaderekta sa District Engineering Office.
Sa pihak nga bahin, gin-athag man sang opisyal nga may-ara sang Construction Material Price Data ang DPWH, nga nagaserbe basihan sang tagsa ka District Engineering Office sa presyo sang mga materyales, nga gina-update duha ka beses sa isa ka tuig.
Apang ang yara lamang sa item amo ang cat’s eye nga nagabalor lamang sang P600.
Nahibaluan nga lain ang cat’s eyes sa solar pavement stud, bangod ang cat’s eyes ang may-ara pa sang elevation sa gwa sang dalan, samtang ang solar pavement stud naman ang ginalubong sa semento.
Sa karun ginahulat pa nila ang dokumento gikan sa DPWH-Bacolod.
