Hugot ang intelligence monitoring sang Women and Children’s Protection Desk sang Bacolod City Police Office agud matumod ang mga indibidwal ukon grupo sa likod sang online sexual abuse and exploitation of children (Osaec) sa ciudad.
Sang tinalikdan nga adlaw, duha naman ka babayi nga menor de edad nga biktima sang Osaec ang narescue sang mga otoridad
Sila ang nagaedad sang 13 kag 14 anyos, lunsay taga-Bacolod.
Bangud sini, 10 na ka menor de edad ang narescue paagi sa coordinated operations sang mga ahensya halin bulan sang Hunyo asta Hulyo.
Suno kay Police Capt. Ma. Liberty Indiape, head sang WCPD sang BCPO, ang narescue nga mga menor de edad ang yara sa karon sa protective custody sang mga social workers para sa proper case management, healing kag recovery.
Suno kay Indiape, ginatutukan nila ang mga impormasyon nga nagakabaton agud matumod kun may grupo nga naga-operate ukon indibidwal lang ang nagagamit sang mga kabataan agud nga makakwarta paagi sa online.
Aminado ang WCPD head nga alarming ang impormasyon nga ‘hub’ sang sexual exploitation ang Bacolod gani hugot ang monitoring sang intelligence team para diri.
Nagpanawagan si Indiape sa publiko nga indi magpangduha-duha nga maghatag sang impormasyon sa ila agud nga makahatag sila sang immediate response.
Sarang nga makatawag sa 911 kun may yara sang ipalab-ot nga impormasyon.
Pasalig ni Indiape, ginakabig nila nga confidential ang tip kag hatagan ini sang nagakaigo nga atensyon.
