Ginahulat na lamang sang Inter Agency Task Force against COVID-19 sang Bacolod ang resulta sang polymerase chain reaction (PCR test) sa swab sample nagikan sa mga himata sang COVID patient No. 8 sa ciudad nga ginpadala sa testing center sa Iloilo.
Sa interview sang Bombo Radyo Bacolod kay Vice Mayor El Cid Familiaran, nagapasalamat ini sa Ginoo nga nagnegatibo sa rapid test ang pamilya sang patient # 8 sang Bacolod.
Ang manghod naman sang patient #2 sang probinsya ang negatibo man sa ginpatigayon nga rapid testing.
Gin-athag man sini nga wala nagakahulugan nga kun nagnegative sa rapid test, mangin negatibo man ang polymerase chain reaction ukon PCR test.
Ginpahayag man sang bise alkalde nga ginlift na ang pagcordon sa Banaue kag Eroreco matapos nga Covid free na ang lugar.
Iya man ginalantaw nga mahimo man mabaylo na sa general community quarantine nagikan sa enhanced community quaratine ang ipatuman sa ciudad kun magpadayon nga negatibo ang resulta sa PCR test.
Apang ginatugyan niya lamang ini sa alkalde ang pagdecision angot sa Enhanced Community Quarantine nga bayluhan sang General Community Quarantine.
Nagpahanumdom man ini tuhoy sa lockdown sa ginapatuman sa ciudad kada adlaw sang Domingo.
