Nagpanawagan sa publiko ang bise alkalde sang syudad sang Bacolod nga untatan ang pagdiscriminate sa mga call center agents matapos nagtaliwan ang isa ka business process outsourcing employee bangud sa Covid -19.
Sa inteview sang Bombo Radyo Bacolod kay Vice Mayor El Cid Familiaran, pinuno sang Inter-Agency Task Force, ginpahayag sini nga ginremind niya ang mga Business Process Outsourcing (BPO) companies sa Bacolod nga dapat magsunod sa health protocol agud maproteksyunan ang mga empleyado.
Kasunod ini sang pagtaliwan sang call center supervisor nga nagpositibo man sa Covid-19.
Magluwas diri, may yara sang isa pa gid ka BPO employee sa syudad ang nagpositibo man sa balatian.
Suno diri, indi sila nagakadapat nga idiscriminate bangud sila ang makabig nga life blood sang syudad bangud isa sila sa pinakamadamo nga nagabuhi sa ekonomiya sang syudad.
Ginpahayag man ni Familiaran nga may yara ang BPO companies sang in-house doctor kag nurses nga nagapatigayon man sang mga rapid testing agud mamonitor man ang mga empleyado.
Nagpahanumdom si Familiaran nga may yara sang penalidad ang ano man nga akto may angot sa discrimination sa idalum sang Revised Penal Code.
