Makabig na nga kadalag-an sang Manokan Country ang pagsugot sang Bacolod City Government nga icondone ang interes sa arrears sang mga tenants.
Ini kasunod sang pagpadulong sang mga tenants sa Office of the City Mayor agud magdialogo kay Bacolod City Mayor Alfredo ‘Albee’ Benitez.
Sa interview sang Bombo Radyo Bacolod kay Atty Jomax Ortiz, ini napatigayon pinaagi sa united front sa bulig man sang Diocese of Bacolod kag media.
Nahibaluan nga gin-extend pa sa Agosto 19 ang tyansa sang mga tenants sa pagsaylo temporaryo nga pwesto sa terminal hub sang SM City Bacolod.
Suno diri, ang sadto 12 ukon 14 lamang nga tenants nga nagapakigbato sa kawsa tubtob nga bilog na nga 24 ka mga vendors ang naghugpong.
Pahayag ni Ortiz nga sa pagcondone sang pila ka tuig nga interes sa mga arrears, gamay nalang gid ang balayran sang mga tenants.
Dugang pa nga ginpalawig man ang ila tyansa sa pagbayad kun sa diin sila ang ginhatagan pa sang 18 ka bulan tubtob duha ka tuig agud mabayaran ang utang sa ciudad samtang ginaredevelop ang Manokan Country.
Dako ang pasalamat sang alkalde sa tanan nga nagbulig kag nagsimpatya sa iya mga kliyente.
Suno diri, ang pagsulod sa public private partnership ang nahibaluan nga ginapatigayon sang SM Prime Holdings Inc. indi lamang sa Bacolod City kasubong man sa Iloilo kag Baguio City.
Nakita man sini ang kaayuhan sang proyekto para sa ciudad, kag kun may ara pa sang magapamalabag, ginapasalig ni Ortiz nga indi na maga-intra ang mga tenants sang Manokan Country.
Suno diri, sa makita nga plano ginapakamaayo sini nga may ihamtang nga tatlo ka CR para sa babayi kag tatlo man ka CR para sa lalaki, kag madula naman sa pasilidad ang sadto ginareklamo nga mga tanga kag ilaga.
Sa karun nga wala pa makasaylo sa temporaryo nga pwesto, padayun gihapon ang pagbaligya sa Manokan Country.
