Nagapasalamat si Janice Galvez sa pagbisita sang Secretary of Interior and Local Government kag Philippine National Police Chief sa wake sang iya bana nga si Police Master Sergeant Romulo Galvez.
Sa interview kay Janice Galvez, asawa ni Police Master Sergeant Romulo Galvez, pulis nga gintiro samtang nagapatigayon sang drug buy-bust operation sa Brgy. Singcang Airport, Bacolod City sang tinalikdan nga Abril 9, ginpabutyag niya ang iya pagpasalamat sa pagbisita ni Department of the Interior and Local Government (DILG) Secretary Juanito Victor “Jonvic” Remulla kag PNP Chief General Jose Melencio Nartatez Jr sa wake sang iya bana.
Suno kay Galvez, daku nga bulig sa ila pamilya ang presensya sang mga opisyal kag kasubong man sa ginhatag nga financial support.
Iya man ginpahayag ang pagpasalamat sa iya mga himata ilabi na sa pamilya ni Galvez, amo man sa mga nagbulig sa ila sa emosyonal, ispiritwal, kag pinansyal, lakip na ang Local Government Unit kag bug-os nga PNP.
Natalana ang lubong ni Galvez sa Domingo, Abril 26, sa Forest Lake Memorial Park, Sum-ag, Bacolod City.
