Ginpahibalo na sang gobyerno sang Pilipinas ang International Criminal Police Organization (Interpol) natuhoy sa kaso ni dismissed Bamban Mayor Alice Guo suno kay Senator Risa Hontiveros.
Si Guo ang ginaalegar nagbiya sa Pilipinas sang tinalikdan nga bulan sa tunga sang sampaw-sampaw nga ginapangatubang sini kag siya ang yara na sa karun sa Indonesia.
Suno kay Hontiveros, sa impormasyon nagikan sa Department of Foreign Affairs, nareport na sa Philippine Center on Transnational Crime and Interpol ang mga passports nanday Guo, mga utod sini nga sanday Wesley kag Sheila kag Cassandra Ong para sa nagakaigo nga tikang.
Suno kay Hontiveros, ini ang nagapatimaan nga sarang nga madeterminar sang Interpol kun ano nga sahi nga tikang ang pagahimuon sini agud ma-accomodate ang request sang Pilipinas.
Ginkumpirmar naman sang National Bureau of Investigation nga nagakoordinar ini sa karun sa Interpol natuhoy sa ihibalo ni Guo.
