Temporaryo nga magadeploy sang traffic enforcers agud mamanage ang paggutok sang trapiko sa intersection sang Bacolod Economic Highway kag Bacolod-Murcia Road.
Sa interview sang Bombo Radyo Bacolod kay Bacolod Traffic Authority Office Deputy Head Jose Antonio “Jojo” Robello, tuman sa karun ang paggutok sa nasambitan nga intersection bangod madamo ang indi luyag maghatag sang ligwa.
Dugang pa sini nga madamo sang nagmanol-manol matapos mahype sa social media ang dalan, gani apisar nga madamo sang maayo nga routa may mga nagapili gid nga sa Bacolod Economic Highway maglabay.
Nagalaom man ini nga sa umpisa lamang ang problema kag mahagan-hagan na sa katapusan sang Oktubre.
Sa karun, tuman ang kagutok sang trapiko sa nasambitan nga lugar partikular na pagpatak sang alas-4:00 sang hapon tubtob alas-7:00 sa gab-i.
Bilang short term solution, nadesisyunan nila nga magdeploy sang duha ka traffic enforcers sa nasambitan nga mga inoras.
Sa long-term solution, sila ang magasuhestyon pa sa City Planning Division kag City Engineer’s Office sa paghamtang sang traffic lights sa nasambitan nga area.
Ginakahangawa man sini nga bangod sa madamo ang mga nagalabay nga indi pa kabisado ang dalan, ini ang mangin kaangay sa Circumferential Road sang bag-o pa lamang natukod kun sa diin halos kada semana may ara sang nagaluntad nga aksidente.
Gani panawagan na lamang sini sa mga motorista partikular na sa mga nagadala sang motorsiklo nga maghalong sa byahe.
