Tuman ang kalipay sang mga benepisyaryo sang Comprehensive Agrarian Reform Program (CARP) sa Brgy. Napoles, Bago City nga madali nalang sila ma-install sa duta nga ila ginatalauma paagi sa programa nga ginapatuman sang Department of Agrarian Reform.
Hulyo 3 sang udto, nagpadulong sa Bombo Radyo ang pila ka mga pumuluyo nga naga-istar sa Sian property sa Brgy. Napoles agud hibaluon ang status sang duta nga natalana na kuntani nga iga-award sa ila bilang agrarian reform beneficiaries.
Suno kay Philip Francisco, wala gihapon na-award sa ila ang certificate of land ownership award (CLOA) bangud may yara sang naga-squat sa duta.
Ang mga naga-squat suno kay Francisco ang nagapuyo man sa hacienda apang indi sila tenants sa duta.
Sa pagpakig-angot sang Bombo Radyo kay DAR Region 6 Director Stephen Leonidas, ginpaathag sini nga ang mga squatter sa Sian property ang nagsumiter sadto sang petition for inclusion agud mangin kabahin sang mga benepisyaryo sang CARP kag makabaton sang duta.
Sa ginpatigayon nga review sang DAR Region 6 tinalikdan nga sinemana, gindisqualify ang mga squatter nga mangin ARBs kag nagpagwa man sang certification ang regional director tuhoy sa disqualification.
Kasunod sini, ginmanduan ni Leonidas ang municipal agrarian reform officer nga sapulon sa Hulyo 5 ang mga petitioner agud paathagan tuhoy sa ila disqualification nga mangin ARBs.
Pagkatapos sang pagsinapol sa mga squatter, sapulon naman sang MARO ang mga tagreklamo agud matalana na ang pag-award sang CLOA kag pag-install sa ila sa tulunga-on nga duta.
Bangud sini, tuman ang pasalamat ni Francisco nga mahatagan na sang solusyon ang madugay na nila nga problema kag makaangkon na sang kaugalingon nga duta sa mas madali nga panahon.
