Ginahulat pa sang Sangguniang Panlungsod ang sabat ni Bacolod City Mayor Greg Gasataya sa resolusyon nga nagapanawagan nga idefer ang payment para sa 3rd party garbage hauler nga IPM Construction and Development Corporation para sa bulan sang Disyembre.
Sa interview sang Bombo Radyo Bacolod kay Councilor Dindo Ramos, author sang resolusyon, nakita nila ang pigaw nga serbisyo kag bayolasyon sa kontrata sang IPM sang nakaligad pa nga binulan.
Ang Bacolod City Government ang gin-ulan naman sang madamo nga reklamo tuhoy sa mga indi makolekta nga basura, delayed nga pagturn-over sang 3-wheeled vehicles nga nakapagkit sa kontrata kag ang guba nga mga garbage haulers gani pipila lamang ang nagalibot sa ciudad.
Nahibaluan nga ang IPM ang dapat nga magturn-over sang 21 ka units sang Racal units sa mga Barangay agud magamit sa paghakot sang mga basura sa mga eskinita nga indi na masulod sang garbage trucks.
Apang karun lamang nila maturn-over sa Bacolod City Government ang Racal units pila na lamang ka adlaw bag-o matapos ang kontrata sang IPM sa Disyembre 31.
Suno kay Ramos, sa kadamuon sang violations sang IPM sa kontrata, sila ang may natuga na nga liquidated damages.
Gani ginapangabay nila sa alkalde nga indi anay ihatag ang bayad sa garbage hauling subong nga Disyembre tubtob nga wala nasettle sang IPM ang penalties, ukon mahimo man nga ini ang ibuhin na lamang sa bayad.
