Liwat nga gindeklarar nga winning bidder ang IPM Construction and Development Corporation sa natapos nga bidding para sa hauling sang basura kag management sang sanitary landfill sang ciudad sang Bacolod.
Sa interview sang Bombo Radyo Bacolod kay Bids and Awards Comittee Head Jean Ramos, santo sa resulta sang bidding ginpierdi sang IPM ang Metrowaste Solid Waste Management Corporation.
Suno kay Ramos, nangin non-compliant ang Metrowaste sa Eligibility Requirements kun sa diin nangin madinalag-on ang IPM sa bidder’s contract price nga P156, 399,150.00 para sa hauling sang basura samtang P63, 998,000.00 naman para sa management sang landfill.
Suno pa kay Ramos, napierde ang Metrowaste Solid Waste Management Corporation bangud wala ang mga ini nakapasa sang eligibility requirements kag wala man ang mga ini nakapasar sa technical eligibility.
Ginahatagan man sang kahigayunan ang napierde nga garbage hauler nga magfile sang motion for reconsideration kun may yara sila sang nasubmit nga mga documents nga kinahanglan hatagan sang konsiderasyon sang Bids and Awards Committee apang indi na ang mga ini makadugang sang dokyumento bangud natapos na ang deadline sang submission sang dokyumento.
Nahibaluan nga P183,000,999.00 ang approved budget for the contract (ABC) sa hauling samtang P64 million naman para sa management sang landfill.
Ginpatigayon ang bidding sa session hall sang Sangguniang Panlungsod kon sa diin duha lamang ka mga kontraktor ang nag participate sa bidding.
