Liwat nga nagdaog ang IPM Construction and Development Corporation bilang garbage collector sang Bacolod City.
Sa interview sang Bombo Radyo Bacolod kay Bacolod City Environment and Natural Resources Office Head Ma. Fe Tresfuentes, lone bidder ang IPM kag ang ila kontrata ang magasugod sa Pebrero 1.
Madumduman nga matapos na kuntani ang ila kontrata sang Disyembre 31, 2024, apang gin-extend sang isa ka bulan ang kontrata bangod wala pa matapos ang bidding process.
Ang Approved Budget Contract ang balor P304 million samtang ang bid amount ang nagdangat naman sa P303 million.
Suno kay Tresfuentes, may pila ka revision kag updates sa kontrata kaangay na lamang sa pagpasaka sang hauling volume sa 400 tonnes per day gikan sa anay 347 tonnes per day sang 2024.
Ini bangod ginakulang ang nauna nga volume, gani madamo sang indi mahakot nga mga basura bangod indi na bayad kun magsobra sa volume.
Ginpasakaan man ang numero sang garbag compactor trucks sa 35 gikan sa anay 20, kun sa diin magatalana sang magakolekta sa downtown areas kag mga subdivision.
Ginpasanyog man ang garbage bin system kun sa diin ginpasaka sa apat ang hook lift truck gikan sa anay duha samtang pasakaon man sa 60 ang mga bins ukon basurahan nga ibutang sa kada Barangay nga mabudlay ma-access gikan sa anay 20.
Ini agud may hamtangan sang mga basura kag indi ma-ukay sang mga kasapatan.
Magapadala man sang dugang nga 20 ka 3-wheeled waste collection unit.
Suno kay Tresfuentes, nakaligad tuig yara sa P18 million tubtob P20 million ang ginabayad sa waste collection kada bulan, apang sa karun nga ginpasakaan ang volume, nagalaom sila nga magadangat sa P25 million tubtob P27 million ang bayaran sang ciudad kada bulan.
Ang tinutuyo sang development amo ang mapanubo ang basura sa ciudad kag malikawan ang delays sa pagkuha sang basura.
Samtang wala naman sini napatpat ang nahanungod sa landfill management.
