Ginapasumiter ni Bacolod City Mayor Greg Gasataya sang Collection Route Plan ang IPM Construction and Development Corporation tubtob sa Lunes.
Sa pahayag sang alkalde, nagpatawag sang meeting ang IPM upod ang Bacolod Environment and Natural Resources Office (BENRO), City Legal Office, City Administrator Atty Mark Mayo, kag Secretary to the Mayor Atty Marty Go, kag sila ang nagpresentar sang ila operations kag collections.
Apang suno kay Mayor Greg, solusyon ang luyag niya mabatian gani nagrequest ini sang Collection Route Plan nga amo ang sundon.
Suno diri, kun alas-7:00 sang aga ang schedule, tayog na ang alas-7:15 nga delay sa collection.
Isa sa ginalantaw sini nga dapat solusyonan amo ang collection sang basura sa mga subdivision, bangod kun adlaw na, sa masami wala na sang tawo ang mga pamalay gani indi na mapagwa ang basura.
Indi man nila pwede nga ibilin sa gwa ang basura bangod mahimo laptahon sang sapat, gani kun kis-a sila ang nagabayad nalang sang magahaboy, nga ginapilak lamang sa kilid sang dalan.
Panugyan sini nga dapat iprayoridad nga temprano nga makolekta ang mga basura sa mga subdivisions.
Ginsuhestyon man sini ang pagtalana sang hotline nga 24/7 kag para lamang sa pagbatun sang complaints, bangod natalupangdan sini nga ang numero nga ginahatag ang iya ka personnel kag ginadala sa pagpauli.
Ang IPM ang nagtanyag man sang dugang nga Racal, apang pahanumdom sang alkalde nga antes maghatag sang donasyon, dapat unahon anay ang paghatag sang mas maayo nga serbisyo.
Suno diri, ang igastos sa pagdonar ang gamiton na lamang sa pag-imprubar sang collection process.
Paathag ni Mayor Greg nga bisan naghatag sang Racal sa mga Barangay, kun kis-a ini ang indi man effecient kun wala sang manpower kag wala sang gasolina.
Panugyan sini sa IPM nga magshape-up bangod kun indi ma-imprubar ang serbisyo, ang ciudad ang may himuon na nga tikang.
