Nagpasalig ang Iran sa Pilipinas nga luwas nga makalabay ang mga Philippine-flagged ships kag tanan nga Filipino seaferers sa Strait of Hormuz.
Apektado ang nasambit nga pantalan bangud sa nagapadayon nga gyera sa Middle East nga naga-apekto sa global oil supply.
Suno sa Department of Foreign Affairs (DFA), ang kasugtanan ang nahuman matapos ang pag-istoryahanay sa telepono nanday Foreign Affairs Secretary Ma. Theresa Lazaro kag Iranian Foreign Minister Seyed Abbas Aragchi.
Ginpahayag sang DFA nga nagpasalig ang Iran nga tugutan ang safe kag wala sang pamalabag nga paglabay sang mga barko sang Pilipinas sa Strait of Hormuz.
Kasunod ini sang hingyo sang Pilipinas nga kabigon ini bilang “non-hostile country” sang Iran.
Suno sa DFA, kinahanglanon gid ini agud maproteksyunan ang mga seafarers kag mapabaskog ang seguridad sang enerhiya sa pungsod, ilabi na bangud mataas ang presyo sang langis rason nga nagdeklarar sang state of national energy emergency ang Pilipinas.
