Nagpromisa si Iranian Foreign Minister Abbas Araqchi nga pagagamiton nila ang tanan nga options agud ipakigbato ang ila soberenya matapos ang nagluntad nga pagpangbomba sang Estados Unidos sa tatlo ka mga nuclear facilities sini.
Bilang pagtimalos, nagpagwa ang Iran sang mas madamo nga mga missiles padulong sa Israel kun sa diin apektado ang ciudad sang Tel Aviv kag Jerusalem nga gintunaan sang pagkaguba sang mga pamalay kag pagkapilas sang 16 ka mga sibilyan.
Nagpaandam ang Iran nga indi ini magpa-intimidate sa Amerika kag gintawag nga illegal ang opensiba sang Estados Unidos.
Suno diri, wala sang radioactive materials nga nabilin nga posible maglupok sa mga pasilidad sang Natanz, Isfahan kag Fordow.
Suno kay Bombo International News Correspondent Elvie Pregua direkta sa Tel Aviv, Israel, apisar sang mga missiles kag drones nga ginapalupad sang Iran kada adlaw, normal sa gihapon ang sitwasyon sang mga pumuluyo.
Suno sa iya, hilway nga makapadulong sa mga buluthuan, trabaho kag merkado ang mga tawo.
Nagapadala lamang sang alert ang gobyerno sa ila mga cellphone sa tion nga kinahanglan na nila magpadulong sa mga bomb shelters.
Suno kay Pregua, wala man sang problema ang iron dome sang Israel apang may mga tion nga indi ini maka-intercept sang mga drones nga ginagamit sang Iran bangud indi niya ini madetect.
Wala pa sa karun sang abiso ang gobyerno sang Israel sa mga pumuluyo samtang nagpanawagan naman ang Philippine Embassy sa mga Filipino nga luyag magpauli nga makig-angot lamang sa ila.
Apang kun si Pregua ang pahambalon, wala ini sang plano nga magparepatriate bangud anad na ini sa gyera.
