Ginbuyagyag sa ika-11 nga adlaw sang impeachment trial ni Vice President Sara Duterte ang gin-alegar mga iregularidad sa liquidation documents nga ginsumiter sang Office of the Vice President (OVP) para sa paggamit sang P125 million nga confidential funds sang 2022.
Suno kay anay Commission on Audit (COA) state auditor Roderick Wamil, nga nagserbe bilang prosecution witness, acknowledgment receipts lamang ang ginsumiter sang OVP bilang pamatuod sang paggastos sa baylo nga sales invoices ukon official receipts sa idalom sang 2015 Joint Circular sa paggamit sang confidential kag intelligence funds.
Kalakip sa mga ginhingadlan ni Wamil sa pila ka mga acknowledgment receipts nga may petsa nga Disyembre 2023, ang mga transaksyon nga nakapangalan kanday Mary Grace Piattos, Renan Piattos, Nova Santos, Mico Harina, Andy Lim, Gabriel Bisaya, kag Alejandro Pikit.
Suno diri, indi ini sakop sang 2022 confidential fund allocation kag wala man sang iban nga supporting documents nga ginsumiter agud mapamatud-an ang mga transaksyon.
Ginpaathag man sini nga wala nagakahulugan nga confidential ang tanan nga detalye sa confidentials funds.
Ang dapat lamang nga confidential amo ang katuyuan sang operasyon kag indi ang mga identity sang mga nagbaton sang pondo.
Dugang pa ni Wamil, gingamit man sang OVP ang bahin sang pondo para sa medical kag food aid nga nagdangat sa P40 million, kasubong man sang mga incentives, rewards, kag traveling expenses nga nagabalor sang P10 million, mga expenses nga wala ginatugutan sa idalom sang 2015 Joint Circular.
