Halos indi makapati ang 2023 Radiologic Technologist Licensure Examination passer matapos ini nga nagtop 7 sa board exam.
Sa interview sang Bombo Radyo kay Era Samantha Anica Abay Gauma nga graduate sang Riverside College Incorporated, nagapamati gid ini sa ila nga klase agud nga pag-abot sini sa ila nga balay may oras nga ini makarelax.
Suno diri, sang ini nakagraduate, nag-umpisa ini sa pagbasa sang libro agud iya ma-amat amat nga matun-an.
Suno kay Gauma, ang kurso nga Bachelor of Science in Radiologic Technology ang indi sini una nga choice nga siya kuntani magasulod sa kurso nga psychologist apang pagpa-enroll sini antes niya ginpasa ang iya papel, iya narealisar nga siya interesado man sa pagtuon sa Radiologic Technology.
Isa naman sa nangin kabudlayan sini amo ang time management kun sa diin madamo pa gid ini sang mga activities kag program nga gina-intratahan.
Pahayag ni Gauma, sang siya yara pa lamang sa elementarya, kun kaisa wala ini nagasulod sa klase, wala man ini nagapasa sang assignment kag wala man ini nagatuon sang maayo apang sang ini nagtapak na sa high school didto na ini nag-umpisa nga mag tutok sa pagtuon.
Samtang, sa adlaw naman nga naggwa ang resulta ang board exam, una nasubuan ini bangod nga wala sini nakita ang iya pangalan sa lista sang mga top notcher bangod tubtob sa top 6 lang ang makita sa ginpasa sa iya nga picture apang siya nakibot nga madamo sang nagcongratulate sa iya nga siya ang yara sa top 10 kag didto na sini nakita ang kabug-usan nga resulta kag yara ang iya pangalan sa top 7.
Gilayon ini nga nagdalagan sa iya ginikanan kag naghibi bangod sa tuman ka kalipay kag nagpasalamat man ini sa iya pamilya nga nangin inspirasyon sini sa paglab-ot sang iya handum.
