Totally damaged ang isa ka balay matapos ginlamon sang kalayo sa Purok Paho, Barangay Taculing, Bacolod City subong nga hapon.
Ang balay ang duha ka panalgan kag semi concrete apang nagapangibabaw ang light materials.
Nagapuyo diri ang isa ka pamilya nga may lima ka miyembro kun sa diin lunsay menor de edad ang tatlo ka kabataan.
Sa interview sang Bombo Radyo Bacolod kay Precy Mahilum, utod sang nagapanag-iya sa nasunog nga balay, yara sa libertad market ang utod sini nga si Freddie George Mahilum bangod sa trabaho sang natabo ang sunog.
Nabilin naman sa ila nga balay ang nagabusong sini nga asawa kag tatlo ka kabataan nga naga-edad singko anyos, tres anyos kag isa ka tuig nga bata.
Yara sa gwa ang asawa sang nag-umpisa ang sunog sa ila kwarto.
Gilayon naman sini nga ginkuha ang kabataan.
Wala na nahimo nga mapalong sang mga pumuluyo sa palibot ang kalayo bangod dako na ini sang makit-an.
Ang sunog ang nag-umpisa kapin ala-1:00 sang hapon kag napatay kapin alas-2:00 sang hapon.
Bangod sa kalayo, naubos gid ang mga pagkabutang sang pamilya, magluwas lamang sa mga nakahalay nila nga mga panapton sa gwa sang puluy-an.
Negatibo para diri ang posibilidad nga gikan sa kuryente ang sunog bangod nautdan sang kuryente ang iya nga utod kag lunsay mga solar powered ang mga gamit.
Indi man mahimo nga kandila ang rasun, bangod masanag man sa lugar kag udto sang natabo ang insidente.
Wala naman gilayon nakasulod ang firetruck sa lugar bangod sa magutok ang area.
Samtang nagpasalig naman si Punong Barangay Lady Gles Gonzales-Pallen sang Barangay Taculing nga sila ang magabulig sa nasunogan.
Nagapakig-angot naman ini sa Department of Social Services and Development (DSSD) para sa evacuation center nga magamit sang mga biktima kasubong man sa financial assistance gikan sa Bacolod City Government.
Ginpasalig man ni Pallen nga ang Barangay ang magaprovide sang ila kalan-on kag magahatag bulig pinansyal.
Suno sa Punong Barangay, ini ang una nga kahigayunan nga may nagluntad nga sunog sa area.
Sa karun wala pa ini nakakoordinar sa Bacolod City Fire Station sa mahimo rasun sang sunog.
Pahanumdom ni Palen sa mga pumuluyo nga mangin vigilante subong nga Christmas season.
Dapat man nga tudluan ang mga kabataan nga maghalong partikular na sa mga flammable materials kaangay sang lighter, posporo kag iban pa.
Dugang pa sini nga likawan naman ang pagtap sa kuryente bangod ini ang masami man nga ginatunaan sang sunog.
