Padayun pa ang imbestigasyon sang Bureau of Fire Protection – Bacolod sa gintunaan sang sunog nga nagtupok sa isa ka balay sa Purok Incarnation, Barangay Mansilingan, Bacolod City pasado alas-7:00 kaina sang aga.
Sa interview sang Bombo Radyo Bacolod kay Mabelle Franco, kaingod sang nasunogan, ang balay ang ginapanag-iyahan ni Danilo Basco kag kaupod sini nga nagapuyo ang asawa, duha ka kabataan kag duha ka apo.
Apang antes paman ang sunog, ang kabataan kag apo ang una na nga nagpadulong sa Victorias City kagab-i para sa lubong sang ila himata, samtang sila nga mag-asawa ang nag-apas kapin alas-7:00 sang aga.
Suno diri nakalumbos lamang ang tag-iya sang nabatian nila nga may naglupok nga ginsundan sang pagsirit.
Ginpinsar ni Franco nga tangke sang tubig ang naglupok kag nabuslot gani ginsugo sini ang iya bata agud tsekyaron, kag didto na nakita sang bata nga nagakasunog ang katupad nga balay.
Apisar nga totally burned ang balay, ini ang wala na nakalapta sa iban bangod may-ara sang concrete nga pader nga nakapalibot.
Ginalantaw sang mga ini ang posibilidad nga electrical in nature ang rasun sa sunog kaangay sang appliances ukon tuman ka daan nga electric wire.
Sa paglantaw sini, sa bahin sang kwarto nag-umpisa ang kalayo.
