Totally burned ang isa ka balay sa Luzuriaga Street, Purok Mabinuligon, Barangay 30, Bacolod City, matapos gintupok sang kalayo nga ginapatihan tuga sang natumba nga kandila sa altar para sa tigkalalag kahapon sang hapon.
Ang two-storey nga balay ang ginapanag-iyahan ni Celia Peruelo, 81 anyos kag nagaserbe naman nga boarding house ang ibabaw nga panalgan.
Ang balay ang semi-concrete kun sa diin hollowblocks ang idalum kag light materials naman ang ibabaw gani madasig nga ginlamon sang kalayo.
Sa interview sang Bombo Radyo kay Barangay 30 Kagawad Gelo Teodoso, madasig lamang nga nag-abot ang madamo nga mga firetrucks agud magresponder sa insidente.
Madumduman nga humalin pa lamang sang campaign period sa Barangay and Sangguniang Kabataan Elections, naka-heightened alert na ang Bureau of Fire Protection (BFP) kag iban nga ahensya sang gobyerno.
Bangod sini madasig nga napatay ang kalayo, gani apisar nga natupok ang balay ni Peruelo, wala na naulamid pa ang katupad sini nga commercial establishment nga may-ara man sang mataas nga firewall kasubong man ang compound sa natuo sini nga may nakapatunga nga pader kasubong man ang balay sa likod nga human man sa light materials.
Suno kay Teodoso, ginalantaw nila nga gikan sa kandila nga ginsindihan ni Peruelo sa altar sa iya nga kwarto ang kalayo, ginlamon ang mantel tubtob nga nalab-ot na ang foam nga hiligdaan gani madasig nga naglapta ang kalayo.
Wala naman sang iban nga tawo sa balay sang natabo ang insidente magluwas kay Peruelo bangod nagpauli ang iban nga mga boarders sa ila tagsa ka lugar bangod sa tigkalalag.
Sa pihak nga bahin, indi naman makapati si Peruelo sa nagluntad nga sunog.
Suno sa iya, indi mahimo nga natunaw na ang kandila gani nagtuga sang sunog bangod bag-o niya lamang ini ginsindihan matapos ang paghalad, kag temporaryo nga nagpadulong sa kusina.
Nagapati man ini nga indi man gilayon magalapta ang kalayo apisar pa nga matumba ang kandila gani nakibot ini sang nakita ang nagadaba-daba na nga kalayo.
Suno diri, may pila pa ka gamit nga narecover apang kalabanan ang nasunog gid.
Ginkumpirmar man sini nga nagpauli ang iya mga boarders sa nasambitan nga adlaw para sa tigkalalag.
Gin-athag man ni Peruelo nga ang rasun kun ngaa wala nakalatun ang kalayo sa balay sa ila likod, bangod madasig man nga ginbasyahan sang tubig sang mga residente agud indi makatabok kag maglala ang sunog antes ang pag-abot sang mga bombero.
