Nagapabilin nga nakalockdown ang Block 78, Purok Pag-asa, Barangay Estefania, Bacolod City nga ginaistaran sang COVID Patient No. 23 sang ciudad.
Sa interview sang Bombo Radyo kay Punong Barangay Jerry Tingson, wala pa nakagwa ang resulta sang repeat test sa locally-stranded individual nagikan sa Metro Manila nga nagpositibo sa COVID.
Sa karon, wala man sang nakit-an nga sintomas sang COVID sa mga himata sang 38-anyos nga ginang, isa ka semana humalin sang naggwa ang positibo nga resulta.
Asymptomatic man ang Patient No. 23 nga yara sa karon sa Andres Bonifacio Elementary School.
Sa idalom sang pagsulundan sang Department of Health, indi na pag-ipaidalom sa swab test ang mga miyembro sang pamilya sang pasyente kun wala man lang sang nakit-an nga sintomas.
Sa kabug-usan, 22 ka mga balay ang ginlockdown sa Block 78 kag 26 ka mga pamilya ang nagaistar diri.
Nagpasalamat naman si Tingson sa Bacolod City government sa pagbulig sa barangay agud nga mahatagan sang pagkaon ang mga pamilya nga apektado sang lockdown.
Madumduman nga ang patient no. 23 ang isa ka LSI nga nagikan sa Metro Manila kag ini ang nakapauli na sa Purok Pag-asa antes maggwa ang resulta sang swab test bangud natapos na ang 14 ka adlaw nga mandatory quarantine kag wala napahibalo ang mga barangay officials.
