Isa ka bus sang mga pumuluyo nagikan sa banwa sang Valladolid ang nagpadulong sa estasyon sang Bombo Radyo agud magpalab-ot sang reklamo sa local government sang San Enrique matapos ginpangdakop kag ginpalukpan sang Bantay Dagat sang nasambit nga banwa ang ila mga manugtangab.
Sa interview sang Bombo Radyo kay Edeby Samudio, tag-iya sang pump boat, alas 10:00 kagab-i ginpangdakop ang ila mga manugtangab nga yara sa baybayon sang San Enrique apisar nga wala sang advance letter nga nagapahibalo nga sila ang dapat mag-untat.
Suno diri, nagpalupok pa ang mga ini sang walo ka beses kag ginpahog nga tabtabon ang ila mga tangab.
Suno sa iya, tuig 2007 sang gintukod ang Central Negros Council of Coastal Resources Development kun sa diin may yara sang internal agreement nga ang local government unit nga magaparehistro sang ila fisherfolks ang pwede makapangisda humalin Bago padulong sa Binalbagan basta magpadulong lamang sa agricultural office agud maggawad sang fisherfolk permit.
Suno diri, antes paman ang pagtukod sang Central Negros Council of Coastal Resources Development, may yara na sila sang tangaban bangud sila ang nagsugod sang 1956.
Suno kay Samudio, sila ang gindakop bangud nga wala naghatag sang permit si San Enrique Mayor Jilson Tubillara nga sila ang makapangtangab.
Suno sa iya, natalana na kuntani nga irenew sang mga ini ang ila permit subong nga bulan apang wala nagpahanugot ang alkalde bangud wala man ginpahanugutan ni Valladolid Mayor Enrique Miravalles ang mga taga-San Enrique nga magpanguha sang diwal.
Samtang, suno kay Rosela Bayaborda, Municipal Agriculturist sang Valladolid, ang tangaban ang makabig nga traditional fishing kag nagadepende sa municipal ordinance sang isa ka banwa kun sila ang pahanugutan nga mag-operate.
Suno diri, sa Valladolid, ginapahanugutan sila nga mag-operate ukon maghupot sang tangaban ukon magpanagat sang kasag santo sa ila municipal fishing ordinance.
Suno sa iya, wala naman ginapahanugutan ang pagpanalom sang diwal bangud ini ang high value mollusk nga ginaproteksyunan sang banwa gani may yara sang municipal ordinance tuhoy diri.
Naghingyo naman ini sang bulig sa Central Negros Council of Coastal Resources Development kag kun maka-istoryahanay ang mga alkalde, posible nga sila ang mapahanugutan
Nagapawagan naman ang Punong Barangay sang Central Tabao, Valladolid kay San Enrique Mayor Jilson Tubillara nga ikonsiderar ang kahimtangan sang mga taga Valladolid bangud 80 porsyento sang mga pumuluyo sa baybay nagasandig sang ila palangabuhian.
Nagalaom ini nga irenew ang ila permit agud legal sila nga makapangisda sa San Enrique bangud diri sila nagakuha sang palangabuhian nga ila pagakuhaan sang bugas kag pabalon sa ila mga kabataan padulong sa eskwelahan.
Magaistorya si Valladolid Mayor Enrique Miravalles sa Central Negros Council of Coastal Resources Development tuhoy sa common ground fishing area kag ginapakamaayo sini kun kaupod sanday Governor Bong Lacson kag Vice Governor Jeffrey Ferrer.
Suno sa iya, wala pa sila naka-istoryahanay ni Mayor Tubillara tuhoy diri bangud pareho sila nga masako apang wala ang mga ini sang disgustuhanay ukon konflikto sa isa kag isa.
Gin-athag man sini nga may yara sila sang ordinansa nga ang mga taga Valladolid lamang ang pwede magsalom sang diwal bangud ginapreserve ang colony sang mga ini sa dalom.
Dugang pa sini nga wala sang bayolasyon nga ginaubra ang LGU kun ila luyag atipanon ang teritoryo sang diwal.
Suno diri, gina-usisa pa nila kun sin-o ang nagpalupok bangud indi diri otorisado ang Bantay Dagat kag dapat may upod nga pulis.// Suno sa alkalde, kuntani pwede man lang dakpon sa malinong nga paagi kag indi makahatag sang kakulbaa sa ordinaryo nga mananagat.
