Tatlo na ka mga local government units sa probinsya sang Negros Occidental ang nagdeklarar sang state of calamity bangud sa pagbaha nga dala sang Habagat kag Tropical Depression.
Ini ang ginalakipan sang La Carlota City, banwa sang Hinigaran kag banwa sang San Enrique.
Madumduman nga nagrekomenda na ang City Disaster Risk Reduction Management Office (CDRRMO) sang La Carlota City nga ipaidalum na sa state of calamity ang ciudad.
Ang pagdeklarar sang state of calamity ang para may yara sang standby fund ang ciudad nga magamit, apang ini ang subject for confirmation pa.
Samtang, subject for confirmation man ang pagdeklarar sang state of calamity sa banwa sang Hinigaran.
Madutay lamang ang mga evacuees apang madamo sang pmuluyo nga naapektohan sang pagbaha nga iban sa mga residente ang wala na naghalin pa sa ila nga balay.
Madamo sang naapektohan nga pananum kag palangabuhian sang mga residente.
Sa interview sang Bombo Radyo Bacolod kay San Enrique Municipal Mayor Jilson Tubillara, sang Lunes, Setyembre 15, pa gin-aprubahan sang Sangguniang Bayan ang rekomendasyon sang Municipal Disaster Risk Reduction Management Office nga deklarasyon sang state of calamity.
Suno kay Tubillara, madamo sang mga humayan sa banwa ang apektado sang pagbaha kag kalabanan sa mga humay ang yara sa flowering stage ukon inug harvest na.
Suno sa alkalde nagdangat sa P6 million ang balor sang halit sa humayan sa banwa sang San Enrique.
Wala pa diri labot ang duha ka barangay nga indi pa maassess bangud sa pagbaha.
Ang tubig baha sa San Enrique ang nagikan pa sa bahin sang La Carlota kag ciudad sang Bago nga nagapanaog sa ila nga banwa.
Samtang ang ciudad sang Kabankalan ang ginalantaw man nga magadeklarar sang state of calamity bangud man sa pagbaha.
