Pila ka mga political aspirant sa ciudad sang Bacolod ang nagfile sang Certificate of Candidacy agud magpapili para sa 2025 Midterm Elections sa ikapito nga adlaw sang filing period.
Sa interview sang Bombo Radyo Bacolod kay Bacolod City Election Officer Atty. Revo Sorbito, kahapon may pila ka mga political aspirants ang nagfile sang COC nga ginalakipan sang isa para sa Congressman, apat para sa Sangguniang Panlungsod member kun sa diin ang tatlo kag independent kag isa ang may nomination nagikan sa Bayan Muna.
Antes matapos ang ika-pito nga filing sang COC, liwat nga nagfile sang iya certificate of candidacy si Rico Villafuerte.
Ini na ang ikatatlo nga pagdalagan ni Villafuerte bilang konsehal sa Bacolod City.
Si Villafuerte ang una nagkigbahin sa Asenso Convention nga gin-nullify naman ni Bacolod City Mayor Alfredo “Albee” Benitez.
Suno kay Sorbito, ginalauman na nga subong nga adlaw mabaton na sang mga ini ang mga COCs sang iban nga mga political aspirants nga wala pa nakafile.
Dugang pa sini nga mahimo magutok na ang lugar sang ginafilan sang COC gani nagalaom ini nga temprano pa magfile ang mga political aspirants ilabi na ang may dala nga supporters.
Panugyan ni Sorbito nga dapat kumpleto kag nafill-upan sang insakto ang COC.
Kalabanan man nga error amo ang kulang, blanko, sala ang impormasyon kag sala nga forms.
Samtang ginkumpirmar man sini nga si NIR COMELEC Director Atty. Lionel Castillano ang nagtsekyar man sang sitwasyon sang COC filing sa ciudad sang Bacolod.
