Gindala sa ospital ang isa ka dalagita nga nagaedad sang 13 tubtob 15 anyos matapos nga ginlampusan kag gin-alegar nga gintuyo himuslan sang suspek sa Barangay Campanun-an, Mabinay, Negros Oriental.
Sa interview sang Bombo Radyo Bacolod kay Alyas Marivic, kaingod sang biktima, ang dalagita ang Grade 8 student ang nagalakat alas 6:00 ang takna sang aga padulong sa eskwelahan suksok ang school uniform sang hinali lang ginlambatan sang suspetsado nga ginabanta nagaedad sang 40 anyos kag ginbutong pasulod sa kampo sang tubo.
Suno kay Marivic, ginalantaw nila nga ginplanuhan na sang suspek ang himuon sa biktima bangud may yara na sang nakita nga ginkutkot nga duta malapit sa kun sa diin ginguyod ang dalagita.
Ginalantaw man nga nagbato ang dalagita gani ginlampusan ini sang suspek sang bato sa ulo apang ang bata ang nakasinggit gani narescue ini sang mga residente kun sa diin gindala sa ospital agud nga madapatan sang nagakaigo nga pagbulong.
Nacorner kag nadakpan naman sang mga Barangay Tanod sa lugar ang suspek nga nagtuyo pa magpalagyo.
Wala pa mahibaluan sa karun kun nahimuslan gid man sang suspek ang biktima bangud wala na ini sang nasuksok nga palda kag bukas na ang naibabaw sini nga uniform.
Ginpahayag man ni alyas Marivic nga ginapahalong na sila sang ila nga mga bana sa suspek bangud indi masaligan kag dugang pa sini nga may record kag napriso ang suspek nga ginaalegar pagpanghimulos sa kaugalingon nga anak sa una sini nga asawa kasubong man pagpangawat.
Sa karun padayon nga ginabulong ang biktima kag ginahulat pa ang resulta sang imbestigasyon sang mga kapulisan sa banwa sang Mabinay angot sa insidente.
