Luyag sang direktor sang pelikula nga ‘Laragway Sa Karun’ nga mahatagan sang kahigayunan ang mga maniniyot sa pagpakigbahin sang ila nga eksperyensya ilabi na sa karun nga may advance technologies na.
Sa interview sang Bombo Radyo kay Director Pau Ortaliz Santos, ang pelikula nga ginsulat sini para sa Bacolod Film Festival amo ang esturya sang isa ka maniniyot nga may edad na.
Suno diri, sadto uso ang magpapicture sa mga maniniyot apang bangod sa naga-abanse nga teknolohiya kalabanan sa ila ang nagakadulaan sang tiansa sa pagtrabaho.
Nagapati si Santos nga ang ‘Laragway Sa Karun’ ang makahatag sang bulig sa mga maniniyot nga makilal-an sang mga bag-ong henerasyon.
Samtang, suno kay Santos nagapanguna nga kabudlayan nila sa paghuman sang film amo ang kakulangan sang oras kag ang mainulanon nga tiyempo.
Apang, bangod sa pagbinuligay sang grupo nga ginalakipan sang 25 ka miyembro, ila natigayon nga matapos ang ila nga film.
Samtang, dako naman ang pagpasalamat sini sa oportunidad nga ginhatag sang Bacolod Film Festival nga mapakigbahin ang madugay na sini nga handum nga mapabuyagyag ang iya pelikula.
