Isa ka mapait nga trahedya ang natabo sa isa ka pamilya sa Nepal matapos nagkalamatay ang pila ka mga miyembro sini bangud sa isa ka Elepante.
Santo sa report, una nga ginpatay sang sapat amo ang ginikanan ni Shanichara Bote sang 2012 matapos sila gin-atake sang layaw nga elepante nga ginhingadlan nga “Dhurbe”.
Bangud sa kahadlok nga maliwat ang insidente, nagsaylo sila sang puluy-an malayo sa mga layaw nga kasapatan.
Apang, liwat sila nga gin-atake sang pareho nga elepante sa ila bag-o nga gina-istaran.
Ginbawian sang kabuhi ang 25-anyos nga umagad ni Shanichara kasubong man ang iya apat ka tuig nga apo.
Gilayon sini nga ginreport ang trahedya sa District Police Office sang Chitwan, sa Nepal.
Suno pa diri, wala ini nagpinsar nga sila ang matultulan pa sang elepante ilabi na nga masobra na sa isa ka dekada matapos mapatay ang ginikanan sini.
Santo sa mga otoridad, gina-monitor nila ang hulag ni Dhurbe gamit ang satellite tracking collar bangud madugay na ini nga ginakabig nga agresibo.
Nagdangat na sa 25 ang death toll ukon nabiktima ni Dhurbe sa nakaligad nga 23 ka tuig.
Suno sa mga eksperto, kun ginasikway ang isa ka lalaki nga elepante sang bata pa ini, mahimo magtuga ini sang agresibo nga ginawi.
Apisar, indi na makatilingala ang mga pagpang-atake sang mga layaw nga elepante sa Nepal kag India, ginakabig nga tumalagsahon ang nadangatan sang pamilya ni Shanichara Bote, nga makaduha na ka beses nangin biktima sang pareho nga elepante sa magkatuhay nga insidente sa sulod sang masobra isa ka dekada.
