Nagpanindugan ang isa ka grupo sang mga mangunguma sa probinsya sang Negros Occidental nga kuntani nagtalana man si President Bongbong Marcos sang presyo sang humay kadungan sang price ceiling sa regular-milled kag well-milled rice.
Sa interview sang Bombo Radyo kay Myrna Perez Villa, chairman sang Newton-Camingawan-Para Farmers Association sa ciudad sang Bago, indi maayo ang timing sang Executive Order No. 39 bangud nagahamugasa ang alanihon sa karon sa ciudad sang Bago.
Suno diri, na-damage ang humay bangud sa halit sang baha.
Kun nagtalana ang presidente sang limit sa presyo sang bugas sa merkado suno sa iya, kuntani nagtalana man ini sang presyo sang baklanay sang humay bangud hampangan lang sila sang millers kag traders.
Suno sa iya, ang millers kag traders ang nagadikta sang presyo sang humay gani dapat nga may mabakod nga kooperatiba ang mga mangunguma agud nga indi sila madiktahan sang mga nagakumpra sang humay.
Sa pagcompute sang farmers association, dapat indi magnubo sa P20 ang farm gate price sang humay kun P41 ang regular-milled price.
Suno sa iya, wala na gid sang ginansya ang farmer kun P15 nalang ang kada kilo sang humay bangud mahal ang farm inputs kag labor.
