Dakop ang isa ka lalaki nga gina-alegar nagabakal sang boto sa Burgos Street, Barangay Lutao, Bacong, Negros Oriental, kahapon, alas- 2: 35 sang hapon.
Ang nadakpan ang ginkilala kay Romnick Viola Adalim, 36 anyos, single kag residente sang Barangay Combado, Bacong, Negros Oriental.
Sa interview sang Bombo Radyo Bacolod kay PMaj Vann Joel Tingson, Officer in Charge sang Bacong Municipal Police Station, nadakpan si Adalim sa ginpatigayon nga checkpoint.
Nagamaneho sang motorsiklo si Adalim kag nakit-an nga wala nagasuksok sang helmet.
Sang ginpamangkot nga magpakita sang driver’s license kag OR/CR, ginbuksan sini ang iya U-box, kag didto nakit-an ang mga puti nga sobre nga naga-unod sang kwarta kag sample ballot nga may pangalan sang mga kandidato nga nagapapili para sa 2025 National and Local Elections.
Nakumpiskar ang 48 ka long white envelopes kun sa diin 39 diri ang naga-unod sang P900 kada isa nga may kabug-usan nga balor nga P35,100 kag siyam ka envelope nga naga-unod sang sample ballot nga wala sang cash, kasubong man nga nakumpiskar ang motor ni Adalim nga Honda XRM.
Napaslawan si Adalim nga magpakita sang mga authorization ukon documentation sa pagdala sang mga nasambit nga materyales kag siya ang gindakop sa pagbayolar sa COMELEC Resolution No. 11104 ukon “Kontra-Bigay” policy may kaangtanan sa nagahilapit nga eleksyon.
Pahayag ni PMaj Vann Joel Tingson, napasakaan na sang kaso sa prosecutors office ang suspetsado.
