Patay ang isa ka lalaki nga ginapatihan katapo sang New People’s Army sa nagluntad nga engkwentro kahapon sang kaagahon sa Barangay Quintin Remo sa banwa sang Moises Padilla, Negros Occidental.
Sa interview sang Bombo Radyo Bacolod kay Lt. Col J-jay Javinez, pinuno sang Division Public Affairs Office sang 3rd Infantry Division sang Philippine Army, ang tropa sang 62nd Infantry (Unifier) Battalion kag 2nd Negros Occidental Provincial Mobile Force Company ang gilayon nga naglunsyar sang operasyon kasunod sang nabaton nga impormasyon nga may yara sang extorsion activities ang armado nga grupo.
Una nga naengkwentro sang mga ini ang lima ka mga remnants sang Central Negros 1 (CN1) sa Sitio Angalan Brgy Quintin Remo, Moises Padilla, kag ang ikaduha nga engkwentro ang ang nagluntad sa Sitio Saksak Brgy Quintin Remo, Moises Padilla, kahapon, April 04, 2024.
Suno kay Javinez, wala pa sang identity ang napatay nga persona kag ini ang nasapwan sang tropa sang gobyerno samtang ginalagas ang mga nagpalagyo nga katapo sang NPA.
Ginapatihan nga ini ang residente man sang nasambit nga lugar.
Narecover sang mga tropa ang KG9 sub-machine gun, isa ka rifle grenade, medical paraphernalia, magazines with ammunition, personal belongings sang NPA, kag subversibo nga dokyumento.
Sa karun ginatumod pa ang identity sang napatay nga katapo sang rebelde nga grupo.
Padayon man ang panawagan sang gobyerno sa mga nabilin nga katapo sang makawala nga grupo nga magbalik na sa sabak sang gobyerno agud nga liwat nga makaupod ang ila nga mga pamilya kag magpangabuhi sang matawhay.
