Patay ang isa ka lalaki matapos gintiro sa Purok Masinulundon, Barangay 23, Bacolod City, kagab-i, Nobyembre 8, 2025.
Gindala sa ospital ang biktima nga si Alyas Mik kag nagarenta sa Barangay 23.
Sa interview sang Bombo Radyo Bacolod kay Police Major Marc Joel Reclamado, station commander sang Bacolod Police Station 4, ang biktima ang manager sang isa ka car rental sa nasambit nga lugar.
Suno kay Reclamado wala pa matumod ang suspetsado.
Ginproseso naman sang team sang Scene of the Crime Operation ang crime scene kag initial nga narecover ang lima ka basiyo sang wala matumod nga armas-luthang.
Ginahibalo pa sang mga kapulisan ang motibo sa pagtiro sa biktima.
Tsekyaron pa sang mga otoridad kun may yara sang CCTV sa lugar bangud brown-out sang nagluntad ang krimen.
Samtang suno kay Punong Barangay Johnny Esmil sang Barangay 23, Bacolod City, antes natabo ang shooting incident nagaestoryahanay pa ang biktima kag ang gunman kag sa wala mahibaluan nga rason naglagsanay ang mga ini nga nagresulta nga natiruhan si alyas Mik.
Suno kay Esmil wala man sang record sa Barangay ang biktima apang may mga complaints lang may kaangtanan sa negosyo sini nga salakyan.
Suno sa Punong Barangay gindala ang biktima sa ospital apang bangud sa patal nga pilas nga naagom sini wala na ini matabangan kag gindeklarar nga dead on arrival.
Ginabanta naman anum ka mga lupok ang nabatian sa lugar.
Sa karun nagapadayon pa ang imbestigasyon sang mga otoridad sa nagluntad nga shooting incident agud nga matumod ang motibo kag ang suspek.
