Dead on arrival ang biktima samtang pilason ang suspetsado sa insidente sang pagpangbuno nga nagluntad sa Sitio Bunyag, Purok Kalubihan, Barangay Magsaysay, ciudad sang Escalante City.
Sa interview sang Bombo Radyo kay Police Staff Sergeant Jerry Kim Ughayon, imbestigador sang Escalante City Police Station, ginkilala ang biktima kay Salvador Lamoste, 33-anyos samtang ang suspetsado amo si Tammy Abayon, 35-anyos, lunsay mga residente sang nasambit nga lugar.
Suno kay Ughayon, si Abayon ang nagikan sa isa ka birthday party kag ini ang yara sa impluwensya sang makahulubog nga ilimnon sang nagpadulong ini sa atubang balay ni Lamoste kun sa diin siya ang ginsaruso sang ido sang biktima.
Gilayon naman nga nagwa si Lamoste bitbit ang flashlight agud tsekyaron kun ano ang natabo.
Naflashlightan sini si Abayon kag bangud nga nakainom, nangakig ang suspetsado kag nagpauli.
Samtang nagapanginaw naman ang biktima sa ila kusina nga separado sa iya puluy-an, hinali lamang nga nagbalik ang suspetsado kag ginbuno ini sang apat ka beses.
Ginkuha naman ni Lamoste ang bolo sini sa iya balay kag ginlabo man ang suspetsado sang tatlo ka beses.
Nagdalagan si Abayon kag paglab-ot sa atubangan balay sang utod ni Lamoste, sila ang nagpukutay sang biktima.
Naagaw ni Lamoste ang patalum ni Abayon gani nagdalagan ang suspetsado.
Natumba naman ang biktima bangud sa naagom sini nga mga pilas kag gindeklarar nga dead on arrival sang gindala sa ospital.
Nakaagom sang patal nga pilas sa nagkalain-lain nga bahin sang iya lawas ang suspetsado kag a karun nakahospital arrest.
