Patay ang isa ka lalaki matapos nga malumos sa Sicaba River sa Hacienda Bernardita, Brgy. Caduhaan, sa ciudad sang Cadiz kadungan sang selebrasyon sang kapiyestahan ni San Juan De Bautista, kahapon.
Sa interview sang Bombo Radyo Bacolod kay Richmond De Asis, Barangay Administrator sang Barangay Caduhaan, Cadiz City, bangud kapiyestahan ni San Juan De Bautista, nagkadto ang biktima nga ginkilala kay Jose Borte kaupod ang pamilya sini sa daan nga overflow sa nasambit nga barangay agud nga maglangoy.
Nag-inom-inom man ang biktima kaupod ang pamilya apang hinali lamang ini nga naglumpat sa suba.
Suno kay De Asis, alas 12:00 ang takna sa udto sang nadula ang biktima kag ala-1:00 ang takna sa hapon na nakita matapos maglutaw.
Gintinguhaan pa nga irevive ini apang wala na natabangan pa.
Wala man gilayon makita si Borte bangud ang iya ginlumpatan ang daan nga overflow kag mabaskog ang current sang tubig sa natup-an sini.
Wala man naglaom ang mga ini nga may malumos bangud ang biktima ang residente man sang lugar kag masami man nagapaligo sa suba.
Ginalantaw man nga natrap ini sang dalom sang tubig rason nga nadulaan ini sang kabuhi.
Nagpanawagan man ini sa mga pumuluyo nga maghalong ilabi na kun magpaligo sa suba agud malikawan ang kaangay nga insidente.
