Kumpirmado na nga may yara sang isa ka Local Government Unit sa probinsya sang Negros Occidental nga kaso sang African Swine Fever.
Ginkumpirmar ni governor Eugenio Jose ‘Bong’ Lacson, santo sa ginconduct nga laboratory test sa mga sample nga ginkuha sa mga baboy, may isa ka LGU sa sur nga bahin sang probinsya nga positibo may yara sang kaso sang ASF.
Suno diri, dapat halongan nga indi maglapta ang nasambit nga balatian.
Suno kay Lacson, ginabanta nga yara sa 1 percent ang hog population sa probinsya ang naigo sang ASF.
Pahayag sang gobernador, pagasundon ang mga protocol nga ginpatuman humalin sadto para makontrolar ang paglapta sang ASF.
Abiso sini nga kun infected sa ASF ang baboy dapat ini idispose sang insakto kag magpatigayon sang disinfect.
Pahayag sini, nangin madinalag-on ang repopulation sa probinsya sa halit sang ASF apang madugayan pa tubtob nga madula ang ini nga sakit.
Mahibaloan nga nagpagwa na sang executive order ang banwa sang La Castellana sa pagban sa pagsulod kag paggwa sang buhi nga baboy ukon karne sang baboy ukon bisan ano nga prok products sa banwa.
Ang banwa sang Isabela nagpagwa man sang EO nga kun may yara sang luyag magbaligya sa ila banwa sang imported nga baboy dapat may yara sang permit halin sa LGU.
Samtang, ang iban nga LGU nagpatuman naman sang hugot nga pagbantay kag pagstrikto sa pagpasulod sang baboy sa ila area.
