Isa ka manunudlo ang patay samtang 35 ka iban pa nga mga indibidwal ang pilason matapos nga matumba ang bus sang Bacolod City government sa Purok Talos, Brgy Igmaya-an, banwa sang Salvador Benedicto, alas-5:36 kahapon sang hapon.
Sa interview sang Bombo Radyo sa driver sang bus nga si Nelmo Gonzaga, gindul-ong sini ang mga manunudlo sang Paglaum Village Elementary School sa ciudad sang San Carlos para sa ila nga team building sa Sipaway Island.
Alas-4:00 sang hapon sang naghalin sila sa ciudad sang San Carlos para magbyahe na pabalik sa Bacolod.
Paglab-ot sa kurbada sa Purok Talos, Brgy Igmaya-an, banwa sang Salvador Benedicto, mahinay lamang ang dalagan sini kag iya ginkakibot nga wala nagkagat ang preno sang bus.
Suno diri, mas ginpili na lamang sini nga itumba ang bus sangsa madagdag pa ini sa pil-as.
Pagkatumba, gilayon sini nga ginbuligan ang mga pasahero nga makagwa sa bus, samtang napatay naman ang isa ka manunudlo nga ginkilala nga si Arlyn Tolosa Verde.
Pahayag ni Gonzaga, kapin sa 30 ka tuig na ini nga nagatrabaho bilang driver kag siya ang isa ka regular employee sang ciudad sang Bacolod.
Suno sa iya, antes magbyahe ginastekyar gid sini ang kondisyon sang salakyan.
Dugang pa sini, masami man ini nga nagalabay sa banwa sang Don Salvador Benedicto, apang sa karun pa lamang ini naaksidene sa banwa.
Nagpangayo naman sang pasaylo si Gonzaga sa mga biktima, ilabi na sa pamilya sang napatay nga manunudlo, nga wala man sini ginhungod kag wala man sang may nag-ekspektar sa matabo, kag gintinguhaan sini nga masalbar ang tanan.
