Patay ang isa ka menor de edad samtang pilason naman ang duha ka iban pa matapos nga nabungguan sang pribado nga salakyan sa Purok Star Apple, Barangay Caridad, ciudad sang Bago sang Sabado sang gab-i, Mayo 18.
Ang nagtaliwan ang isa ka estudyante nga babayi kag nagaedad sang 17 anyos kag ang mga pilason ang ginalakipan sang isa ka 17 anyos nga babayi kag isa 20 anyos nga lalaki nga ginkilala kay Laurence Maquiling, lunsay mga residente sang Purok Langka, Barangay Caridad sa nasambit nga ciudad.
Sa interview sang Bombo Radyo Bacolod kay Police Staff Sergeant Ronald Javier, traffic investigator sang Bago City Police Station, ang Toyota Vios ang nagabiyahe gikan sa Barangay Caridad padulong sa Bago City Proper.
Pag-abot sini sa Purok Star Apple, nasideswipe sini ang nagaparking nga mga motorsiklo sa higad sang dalan.
Nadalahig ang tatlo ka pedestrians nga gindala sa ospital apang ang isa ka menor edad ang gindeklarar nga dead on arrival.
Suno kay Javier, sa ila nga pag-imbestigar natukiban nga ang kotse nga nakabunggo sa tatlo ka motorsiklo kag tatlo ka pedestrians ang rent a car.
Suno diri, gintawgan nila ang tag-iya sang salakyan kag didto nakilala ang driver nga si Rodolfo Medel Jr, 39 anyos, isa ka negosyante kag residente sang Purok Camunsilan, Brgy. Busay, Bago City, Negros Occidental.
Suno sa traffic investigator, kahapon sang aga, Mayo 19, nagsungka si Medel sa Bago City Police Station.
Wala pa mahibaluan kun mapasaka sang kaso batok kay Medel ang mga nabungguan sini nga pedestrian ilabi na ang pamilya sang napatay.
Ginapahayag nga natulugan si Medel samtang nagamaneho gani nagluntad ang aksidente.
