Patay ang isa ka ginapatihan miyembro sang New People’s Army kasunod sang engkwentro batok sa militar nga nagluntad sa Sitio Taluktok, Barangay Sandayaw, syudad sang Guihulngan, probinsya sang Negros Oriental kaina sang aga.
Sa interview sang Bombo Radyo Bacolod kay Lt. Col. William Pesase, commanding officer sang 94th IB, kapin lima ka mga rebelde nga kabahin sang Central Negros Front 1 sang Communist Party of the Philippines-New People’s Army ang nakaengkwentro sang 62nd Infantry Battalion nga nabase sa Barangay Libas, banwa sang Isabela.
Suno diri, nagapadayon ang clearing operations sang katapo sang 94th IB sa sentro sang Barangay Sandayaw sa syudad sang Guihulngan agud nga madula na ang katapo sang New People’s Army sa lugar.
Nasugata sang tropa sang gobyerno ang katapo sang NPA kun sa diin nagluntad ang engkwentro.
Nagdugay sang lima ka minutos ang pagbayluhay sang lupok bangud nagpalagyo ang mga ini.
Narekober sa encounter site ang isa ka KG9 nga loaded sang isa ka magazine, isa ka magnum 357 nga loaded sang tatlo ka ammos, isa ka hand grenade, kag mga subversive documents.
Wala naman sang pilason sa hanay sang mga militar.
Sa karun, nagapadayon pa ang hot pursuit operation sang 62nd IB.
Ginkilala ang napatay nga miyembro sang Central Negros 1 nga si Pompeo Landesa, 54 anyos, residente sang Sitio Dako, Brgy Sandayao, Guihulngan City, Negros Oriental.
Siya ang imbulbado sa kaso nga murder kag naglapas sa RA 10591 (Comprehensive Law on Firearms and Ammunition) humalin pa sang tuig 2019.
