Patay ang isa ka ginaalegar miyembro sang New People’s Army sa engkwentro batok sa mga katapo sang 62nd Infantry Battalion sa Guihulngan City, Negros Oriental pasado alas 7:00 kahapon sang gab-i.
Sa impormasyon nga nakuha sang Bombo Radyo, nagluntad ang engkwentro samtang nagapatigayon sang security patrol ang mga katapo sang 62nd Infantry Battalion matapos nakabaton sang impormasyon nagikan sa mga sibilyan nga may yara sang presensya sang terorista nga NPA sa Barangay Luz, Guihulngan City.
Nagdugay ang engkwentro sang lima ka minutos kag narecover sang mga militar sa lugar ang isa ka bangkay sang ginaalegar miyembro sang makawala nga grupo.
Narecover man ang isa ka .357 calibre revolver kag isa ka granada.
Wala naman sang may napilasan ukon nasamaran sa bahin sang gobyerno.
