Nakahunong na sa Bacolod Police Station 10 ang isa ka notorious nga akyat-bahay nga nagaoperate sa ciudad sang Bacolod matapos nga madakpan sa ginpatigayon nga drug buybust operation sa Purok Ilaya, Barangay Cabug, Bacolod City.
Ginkilala ang nadakpan kay Edric Pasustento, 23 anyos kag residente sang Purok Ezekiel Moreno Phase 3, Barangay Handumanan, Bacolod City.
Sa interview sang Bombo Radyo Bacolod kay Police Captain Lelanie Lagoting, station commander sang Bacolod Police Station 10, madugay na nila ginamonitor si Pasustento antes ginkasaka ang buybust operation.
Suno kay Lagoting, nakuha gikan sa paghinakop sang suspek ang 4 tanan nga plastic sachet nga may unod sang suspected shabu nga nagabug-at sang 1.5 grams kag nagabalor sang P10,200.
Suno sa station commander, ginatsekyar nila sa karun kun ang suspek ang may kaangtanan sa natabo nga mga pagpangawat sa ciudad sang Bacolod.
Suno diri, si Pasustento ang nadakpan sadtong 2020 kag 2021 sa kaso nga robbery kag RA 7610 Special Protection of children Against Child Abuse, Exploitation and Discrimination Act.
Nakagwa naman si Pasustento sadtong 2021 bangud masami nga absent sa court hearing ang complainant sini.
Samtang, ginahibalo pa sa karun sang Bacolod Police Station 10 kun isa man si Pasustento sa mga naghold-up sa computer shop sa Barangay Handumanan.
Nagpanawagan man ini sa mga residente nga nabiktima sang suspek nga magpadulong sa Station 10 agud nga makapasaka sang dugang kaso batok kay Pasustento.
