Patay ang isa sa remnants sang nadismantle na nga Southeast Front sang New People’s Army (NPA) sa nagluntad nga engkwentro batok sa 11th Infantry Battalion sang Philippine Army sa Barangay Milagrosa, Sta. Catalina, Negros Oriental alas-6:00 kaina sang aga.
Sa interview sang Bombo Radyo Bacolod kay 302nd Infantry Brigade Commander Brig. Gen. Joey Escanillas, nakabatun ang mga militar sang report angot sa presensya sang armado nga grupo sa lugar gani sila ang nagresponder nga nagresulta sa engkwentro.
Nakasumpong sang mga ini ang ginabanta siyam ka mga NPA members samtang naglawig naman sang 20 minutos ang pagbayluhanay sang lupok.
Napatay sa engkwentro ang isa ka lalaki nga miyembro sang makawala nga grupo samtang narecover naman sa encounter site ang isa ka M16 rifle kag siyam ka backpacks.
Sa karun wala pa matumod ang identity sang napatay nga NPA member, samtang padayun naman ang ila nga paglagas sa mga nakapalagyo.
Wala naman sang ginpatigayon nga evacuation bangod malayo man sa pamalay ang lugar sang engkwentro.
Pahanumdom ni Escanillas nga mga pumuluyo na mismo ang nagareport sa mga rebelde nga nagapakita nga wala na ang mga ini ginabatun.
Bangod madamo naman ang mga nagsungka sa otoridad, nagapati ini nga gamay nalang ang nabilin nga miyembro sang makawala nga grupo.
Apang bangud sa ginalantaw pagtinguha sang mga ini nga mabuhi ang ila hanay pinaagi sa pagrecruit sang panibag-o nga miyembro, gani wala man naga-untat ang mga militar sa pagpatigayon sang mga operasyon agud sila ang mapunggan.
Nagalaom ini nga marealisar na sang mga nabilin pa nga miyembro sang NPA nga wala na sang pulos ang ila ginapakigbato.
