Patay ang isa ka katapo sang New People’s Army sa nagluntad nga engkwentro sa tunga sang tropa sang 94th Infantry Battalion sang Philippine Army kag Team 1 sang remnants sang Central Negros Front 2 sa Sitio Bugtangan, Barangay Buenavista, Himamaylan City, Negros Occidental pasado alas 4:00 ang takna sang hapon subong nga adlaw.
Sa interview sang Bombo Radyo Bacolod kay Col. Erwin Rommel Lamzon, natabo ang engkwentro kaina sang hapon kun sa diin ang tropa sang 94th Infantry Battalion sang Philippine Army ang nagapatigayon sang focus military operations sang nakasugata sang mga ini ang lima ka remnants sang Central Negros Front 2 nga nagresulta sa engkwentro.
Suno kay Lamzon, isa diri ang napatay kag ginkilala kay alyas Gringo.
Na-recover ang M16 rifle kag personal kagamitan sang rebelde
Ginpahayag man sini nga mahimo meeting encounter ang natabo gani madasig lamang ang pagbayluhanay sang lupok.
Suno diri, mahimo nagakompyansa ang mga rebelde nga wala ang tropa sang gobyerno bangud sa piniliay apang wala ang mga ini nakahibalo nga lain ang team nga gindeploy para sa election kag ang nagapatigayon sang focus military operations.
Madasig nga natumod ang napatay bangud may intel component nga nakaupod sa combat group sang militar.
Nagapadayon pa sa karun ang pursuit operation sang militar sa lugar.
Wala naman sang nasamaran ukon casualty sa bahin sang tropa sang 94th Infantry Battalion sang Philippine Army.
