Patay ang duha ka miyembro sang isa ka pamilya samtang pilason naman ang tatlo matapos gintiro sang duha ka lalaki nga nakamotorsiklo sa Skid 8, Barangay Nabulao, Sipalay City alas-9:00 kagab-i, Abril 22.
Ginkilala ang mga napatay nga sanday Jonabe Gernaldo, 27-anyos, kasado, wala sang trabaho kag ang tatlo ka tuig nga bata nga babayi nga si alyas Ariela.
Samtang, ang nasamaran naman ang siyam ka tuig nga magulang ni Ariela nga si Honey; Benigna Bargaso, 62-anyos, iloy ni Jonabe, kag Remy Quinto, 46-anyos nga ila man himata.
Sa interview sang Bombo Radyo Bacolod kay Police Lt Cipriano Lumanog III, deputy chief of police sang Sipalay City Police Station , si Jonabe, Benigna, Honey kag Ariela ang yara sa sulod sang ila balay sang hinali lang nag-abot ang duha ka wala makilal-an nga persona nga nakamotorsiklo.
Nagsulod sa balay ang isa ka suspect kag ginpaarakan sang luthang ang pamilya, samtang nagpabilin naman sa motorsiklo ang isa.
Gintiro man sang mga ini ang bag-o lang nag-abot sa balay nga si Remy nga na-igo sa bahin sang natuo niya nga kamot.// Gilayon naman nga nagpalagyo ang mga suspect matapos ang krimen.
Sa karun, nagapadayon ang hot pursuit operation sang kapulisan sa pagdakop sang mga suspetsado.
