Patay ang isa ka pamilya kag isa ka pedicab drayber matapos gin-arado sang tanker nga may karga nga mantika sa North Poblacion, Bacong, Negros Oriental kahapon sang aga.
Sa interview sang Bombo Radyo Bacolod kay Police Senior Master Sergeant Junrey Caro Quinikes, Assistant Investigator sang Bacong Municipal Police Station, ang tanker ang naga-usoy sang North to South nga direksyon sang naglupok ang nawala nga goma sang tanker, ini nadulalan sang kontrol kag gin-arado ang apat ka mga motorsiklo kag isa ka pedicab nga naga-usoy sang South to North nga direksyon.
Patay ang pamilya nga sakay sang motorsiklo nga ginkilala nga saday, Roel kag Analie Pascual kag ang 15 anyos nila nga bata nga babayi.
Gindala pa sa ospital ang bata apang ini gindeklarar nga dead on arrival.
Patay man ang pedicab drayber nga si Militon Blanco.
Wala naman sang tawo ang isa ka balay nga nadalahig sa pag-arado sang tanker.
Ang suspek ang ginkilala nga si Albert D. Baguio kag ini man mismo nagsungka sa Bacong Municipal Police Station.
Yara na karun si Baguio sa paghinakop sang mga kapulisan sang Bacong, Negros Oriental.
Sa karun ginaproseso na ang dokyumento sa pagpasaka sang kaso nga reckless imprudence resulting to homicide kag damage to property batok kay Baguio.
