Kaangay nga gindul-ong sang isa ka persona ang iya kaugalingon sa prisuhan matapos nga madakpan nga may dala nga iligal nga druga sa San Carlos City Police Station.
Ginkilala ang suspetsado kay Gilbert Olid, 36 anyos kag residente sang Don Juan St. San Carlos City, Negros Occidental.
Sa interview sang Bombo Radyo Bacolod kay Police Lt. Ruby Aurita, deputy chief of police sang San Carlos City Police Station, ginpahayag sini nga madul-ong kuntani sang pagkaon ang suspek sa iya abyan nga nakahunong sa nasambit nga police station.
Bilang kabahin sang routine kag standard operating procedure, ginatsekyar ang mga dala sang nagabisita sa priso antes makasulod apang natingala ang station guard sang San Carlos City Police Station nga ang isa ka plastic sang detergent powder ang bukas na kag ang selyo ang ginsunugan kag may nakapkapan nga may nagabulto.
Ginbuksan naman ang plastic kag nakita ang duha ka plastic sachet, kun sa diin ang isa ang naga-unod sang suspected shabu samtang ang isa ang may unod nga napilo nga foil.
Bangud sini gilayon nga gin-aresto kay Olid.
Nakahunong na ini sa San Carlos City Police Station kag natalana nga pasakaan sang kaso nga paglapas sa RA 9165 ukon Comprehensive Dangerous Drugs Act of 2002.
