Ginpanugyanan sang isa ka political analyst si Defense Secretary Delfin Lorenzana nga ipaiway ang pagpagwa sang public statement nga wala pa sang basehan.
Ini ang kasunod sang pagbaliskad ni Lorenzana tuhoy sa pagbunggo sang Chinese vessel sa Pinoy fishing boat sa Recto Bank sa West Philippine Sea.
Nahibaluan nga si Lorenzana ang labing una nga Cabinet official nga nagpakamalaot sa pag-abandonar sang Chinese crew sa 22 ka mga mangingisda apang kahapon, ginpahayag sini nga aksidente lang ang natabo kag nag-apin man ini sa pahayag sang China nga nagbiya ang Chinese vessel bangud sa kahadlok nga palibutan sila sang pito tubtub walo ka Pinoy fishing boats.
Sa interview sang Bombo Radyo Bacolod kay Professor Rodel Taton, dean sang Graduate School of Law sang San Sebastian College Recoletos Manila, ginkakibot sini ang pagkambyo sang pahayag ni Lorenzana bangud siya mismo ang nagpanguna sa pagkamalaot sa insidente.
Suno kay Taton, isa ini ka political issue rason nga ginahulat sang mga Pilipino ang mangin tikang sang gobyerno bisan ordinaryo nga mga mangingisda ang imbolbado.
Suno sa abugado, kuntani gintapos anay ang imbestigasyon antes nagpagwa sang statement ang mga Cabinet officials agud nga malikawan ang division of opinions sang mga Pilipino.
Ang madalom nga imbestigasyon suno kay Taton ang nagakadapat nga impartial agud nga malikawan ang basulay sa magtimbang nga kampo.
