Ginkumpirmar sang isa sa tatlo ka mga priso nga nagsungka na sa Police Station 3 matapos magpalagyo sadtong Lunes sang kaagahon nga tulog ang mga pulis gani nga hilway sila nga nakapuga.
Sa interview sang Bombo Radyo Bacolod kay Ely Lorence Sazon, 20-anyos sang Purok Mahimulaton, Barangay Banago, ginpahayag sini nga posible nagakatulog ang desk officer kag duty jailer gani nga matawhay lamang sila nga nakapaglagyo.
Gin-athag man sini nga ginpukaw lamang siya ni Michael Peñoso agud mag-upod palagyo.
Dugang pa ni Sazon, gintaklas nila ang pader sa likod sang police station 3.
Suno pa diri, ginlakat lang nila paguwa sa highway antes sila nagbulagay.
Pagkatapos sini, nagsakay siya sa tricycle padulong sa balay sang iya abyan sa ila man nga barangay.
Lunes pa sang gab-i sang nagpauli siya sa ila balay kun sa diin gin-engganyo man siya sang iya pamilya nga magsungka.
Bangud sa pagpasalig sang kapulisan nga indi siya pagkastiguhon, nagsurrender ini.
Nahibaluan nga Grade 5 lamang ang nalab-ot ni Sazon kag handom sini karon nga makatapos sa pag-eskwela kag mangin isa ka pulis.
