Patay ang isa ka pulis matapos nga gintiro sang pareho niya man nga pulis sang maabtan nga yara ini sa sulod sang ila nga kwarto sa ila nga balay sa Barangay Tangub, Bacolod City, alas- 5:00 kahapon sang hapon.
Ang biktima ang ginkilala nga si Police Staff Sergeant Jotham Aremtuto, 31 anyos, kasado, residente sang Crossing Agustin, Barangay Paraiso, ciudad sang Sagay, kag siya ang na-assign sa Mobile Patrol Unit sang Bacolod City Police Office; samtang ang suspetsado naman amo si Patrolman Alvin Rios, 26 anyos, single, residente sang Barangay Bugnay, Valderrama, probinsya sang Antique kag na-assign sa 1st Mobile Force Company sang Iloilo Police Provincial Office.
Suno kay Police Major Eugene Tolentino, station commander sang Bacolod Police Station 8, nagsulod si Rios sa balay nila sang iya nga live-in partner.
Pagsulod sa kwarto didto sini nakita si Aremtuto nga wala sang panapton kaupod ang iya karelasyon samtang yara man sa sulod ang anom ka bulan nga lapsag nga lalaki nga bata ni Rios kag sang babayi.
Nagbangon si Aremtuto kag siya ang hinali nga gintiro ni Rios gamit ang cal. 9mm pistol.
Nag-agom sang duha ka igo sa dughan si Aremtuto nga gintunaan sang gilayon nga kamatayon sini.
Gilayon man nga gin-aresto si Rios bangud wala man ini nagpalagyo kag naabtan sang mga pulis sa ila nga balay.
