Padayun ang pagpatigayon sang contact tracing sa mga nakaclose contact sa tatlo ka mga nagpositibo sa COVID-19 sa Purok Kapawa, Barangay Punta-taytay, Bacolod City.
Suno kay punong barangay Leah Palma, mga locally stranded individual (LSI) ang tatlo nga nagpositibo kag katapo sang isa ka pamilya.
Gilayon nga ginkordon kag gindisinfect ang nasambit nga lugar.
Ang mga nagpositibo ang nag-abot sa siyudad sang Hunyo 19, 1:40 sang kaagahon sakay sa Cebu Pacific kag nagikan sila sa Angono, Rizal.
Suno kay Palma, isa sa mga nagpositibo ang nagabusong. Sa karun, may yara na sang 42 ka mga positibo nga kaso sang COVID-19 sa ciudad sang Bacolod samtang 83 naman sa Negros Occidental.
Samtang sumugod naman sang makapauli, suno sa mga Barangay Health Workers (BHW) nga nagamonitor, nagalagaw pa ang mga ini padulong sa mga kaingod nga purok kag naga-inom sang makahulubog nga ilimnon sa mga kaingod nga balay.
Padayun naman nga gina-isip kun pila ang apektado nga pamilya, apang sa pagtan-aw ni Palma, madamo gid ang naapektuhan nga lugar kag pamilya.
Natalana naman nga kuhaon sang City Health Office ang mga nabilin nga pamilya agud nga dal-on sa isolation center.
