Isa ka salakyan, nasunog sa dalan Burgos ciudad sang Bacolod kahapon

Nasunog ang isa ka salakyan nga natapos lang ginpakay-o ang aircon sini sa Burgos Extension Road, Bacolod City, kapin alas- 4:00 sang hapon, kahapon.

Suno sa driver nga si Noel Temporosa, gindala sini ang Mitsubishi Adventure sang iya umagad sa isa ka aircon station para ipakay-o.

Sang ginamaneho na sini papauli ang salakyan, nakibot ini nga nag-aso ang atubang nga bahin.

Suno diri, ginpapahigad sini ang salakyan kag ginpatay kag nagbalik sa aircon station.

Kaupod ang nagkay-o sang salakyan, ila ini ginbalikan sa area apang samtang nagabyahe, ila nakita ang fire truck nga naglabay.

Pag-abot sa lugar nga ginbilinan sini sang salakyan, nakita na lamang sini nga ginapalong na sang mga bumbero ang salakyan nga nasunog na.